Subling nagpahigayon og airstrikes ang militar sa Estados Unidos batok sa tulo ka mga bangka nga gituohang nagdala og ilegal nga droga sa eastern Pacific Ocean.
Sumala sa US Southern Command, ang pinakabag-ong insidente miresulta sa pagkamatay sa walo ka mga tawo.
Ang maong operasyon gibase sa mando ni US Secretary of War Pete Hegseth ug sa Joint Task Force Southern Spear.
Human makumpirma ang intelligence report nga ang mga bangka gi-operate sa mga Designated Terrorist Organizations dayon nilang gipahigayon ang airstrikes sa international waters.
Sukad pa niadtong Setyembre, mikabat na sa 95 ka mga tawo ang namatay tungod sa daghang operasyon sa militar sa US batok sa mga bangka nga nagdala og ilegal nga droga.
Una nang giingon ni US President Donald Trump nga ilang laglagon ug papason ang mga drug cartel nga nagpasulod og ilegal nga droga ngadto sa Estados Unidos.