Gikumpirma sa Philippine Embassy sa Portugal nga wala pa gihapon silay nadawat nga bisan unsang impormasyon mahitungod sa eksaktong lokasyon ni kanhing Ako Bicol Representative Zaldy Co, sumala sa Department of Foreign Affairs (DFA).
Matod ni DFA Spokesperson Angelica Escalona, wala pay nahatod nga report o impormasyon ang embahada ngadto sa ilang opisina bahin sa pinakabag-ong update sa gihimutangan sa kanhing mambabalaod.
Sumala pa ni Escalona, ang pagkansela sa pasaporte ni Co ipahibalo dayon sa Bureau of Immigration (BI) ug sa Philippine Center on Transnational Crime, nga maoy magpahibalo usab sa International Criminal Police Organization (Interpol).
Human niini, ipasulod na sa international alert system ang pasaporte aron mamonitor ang pagsulod ug paggawas niini sa nagkalain-laing nasud.
Bisan pa niini, wala pa matino sa DFA kung adunay foreign passport si Co, tungod kay matod ni Escalona, dili tanan Pilipino nga makakuha og foreign citizenship ginapahibalo sa ilang opisina.
Samtang, sumala sa Department of the Interior and Local Government (DILG), padayon ang ilang koordinasyon sa mga otoridad sa Portugal tungod sa giingong adunay Portuguese passport ang kanhing kongresista.
Una nang gideklarar sa Sandiganbayan si Co nga “fugitive from justice”, samtang ang National Bureau of Investigation (NBI) mihangyo na og red notice sa Interpol batok sa kanhing mambabalaod.