Mukabat na sa kapin kon kulang P5 milyon ang gidangatan nga damyos sa sunog sulod lamang sa halos tulo ka bulan sa lalawigan sa Bukidnon.
Sa eksklusibong pakighinabi sa Bombo Radyo Malaybalay kang F02 Reny Rubillos, Officer-in-Charge, Provincial Chief Fire Safety Enforcement sa BFP-Bukidnon, gibutyag niini nga ang lalawigan nakatala og 34 ka insidente sa sunog gikan Oktubre hangtod unang simana sa Disyembre ning tuiga.
Sumala pa ni FO2 Rubillos, mikabat og P500,000 ang kadaut sa 17 ka insidente sa sunog kaniadtong Oktubre, samtang mukabat sa kapin P4 milyon sa Nobyembre diin adunay 15 ka sunog ang natigayon, ug nakatala usab og P750,000 nga damyos ang sunog sa unang simana sa Disyembre.
Matud ni FO2 Rubillos, kasagaran sa insidente sa nasunog mao ang residential ug commercial structures, diin ang nangunang hinungdan naglakip sa electrical malfunction, unattended cooking, ug overheated appliances.
Samtang pinakadaghan nga insidente ang natala sa dakbayan sa Malaybalay ug Valencia, ingon man sa mga lungsod sa Manolo Fortich ug Maramag.
Gipahimangnoan usab ni FO2 Rubillos, ang publiko sa pagmatngon ug pag-obserbar sa husto nga fire safety practices, hilabi na karong panahon sa kapaskohan ug bag-ong tuig, aron malikayan ang dugang damyos ug posibleng kadaut sa kinabuhi ug kabtangan.