Gipahugtan ang kahimtangan sa seguridad sa tibuok Bukidnon samtang nagkadool ang Simbang Gabi ug holiday season ning buwana, aron maseguro ang kaluwasan sa mga lumolupyo ug mga bisita sa lalawigan.
Sa pakighinabi sa Bombo Radyo Malaybalay kay Police Captain Shiela Joy Jangad, tigpamaba sa Bukidnon Police Provincial Office, giingon niini nga andam na ang mga kapulisan alang sa holiday deployments ilabi na sugod Disyembre 15 ug 16 sa pagsugod sa Simbang Gabi.
Gisiguro ang police visibility sa mga simbahan, plaza, malls, establisyemento ug bus terminals, lakip ang mobile patrol, Oplan Sita ug Oplan Bakal Sita alang sa pagsusi sa posibleng pagdala og ilegal nga armas.
Gipahugot usab ang checkpoints sa mga pagsulod ug paggawas sa lalawigan. Tuyo sa lakang nga mapugngan ang krimen ug maseguro ang malinaw ug luwas nga pagsaulog sa Kapaskuhan sa Bukidnon.