Gisumite na sa independent panel ang ilang evaluation sa kahimtang sa kahimsog ni kanhing Pres. Rodrigo Duterte ngadto sa International Criminal Court (ICC).
Sumala ni Atty. Nicholas Kaufman, ang lead legal counsel sa kanhing presidente, gipahibalo niini nga nadawat na sa depensa ang kopya sa maong report.
Karon, magpabiling confidential ang sulod niini samtang tagaan og higayon ang duha ka kampo nga mopagawas sa ilang opisyal nga komento.
Ikatakda ang deadline sa Disyembre 12.
Sa pagkakaron, dili pa klaro kung magpagawas ba ang ICC og redacted copy sa maong report.
Gihimo sa ICC Pre-Trial Chamber 1 ang panel nga gilangkob sa tulo ka eksperto aron susihon kung kaya ni kanhing Pres. Duterte nga motambong sa pagdungog sa iyang kasong crimes against humanity.
Ang mga miyembro niini mga eksperto sa forensic psychiatry, neuropsychology, ug geriatric ug behavioral neurology.
Gawas sa assessment para sa ‘fitness to stand trial’ sa kanhing presidente, gisusi usab sa panel kung kinahanglan ba siya og mga adjustment alang sa iyang kahimtang samtang nagapabilin sa ICC Detention Centre.