Nasikop na sa kapulisan ang dugay nang gipangita nga si alyas “Naldo”, residente sa Barangay Impalutao, lungsod sa Impasugong, Bukidnon, nga dugay na’ng nagtago sulod sa kapin kon kulang 18 ka tuig.
Matud ni Police Corporal Justine Bryan R. Bungalon, Police Non-Commissioned Officer sa Criminal Investigation and Detection Group-Bukidnon, nga si alyas “Naldo” na-convict sa kaso nga Robbery kaniadtong Setyembre 7, 1999.
Apan nakaikyas kini sa kustodiya kaniadtong Abril 23, 2007 samtang anaa sa Davao Probation Office sa Bureau of Corrections kon BuCor– Davao.
Dugang pa ni PCPL. Bungalon, nga hapit na matud pa mahuman ni alyas “Naldo” ang probation niini, apan nakaikyas kini sulod sa halos tunga sa duha ka dekada.
Human sa padayon nga intel operations sa kapulisan, nasikop kini ning semanaha sa Zone 1, Barangay Impalutao, Impasugong.