Naglaum ang Philippine Sports Commission kon PSC nga malabwan sa Pilipinas ang paghakot og medalya nga naangkon niini sa 2023 Southeast Asian Games sa Cambodia.
Atol sa gipahigayong send-off ceremony sa 1,600 ka Philippine team nga mosalmot sa SEA Games sa Bangkok, Thailand, miluwat si PSC chair Patrick Gregorio nga ang atong mga atleta adunay kakayahan nga malabwan ang record sa medal tally kaniadto.
Sa miaging Cambodia SEA Games, ang Pilipinas nakadaog og 58 ka gold, 86 ka silver ug 116 ka bronze medals.
Gipahibalo usab ni Gregorio nga adunay dugang P6,000 nga allowance ang tanang mga atleta ug coach nga mosalmot sa Thailand ug aduna usab P18,000 nga Christmas bonus.
Ang maong kantidad gawas pa sa P26,000 nga ilang madawat isip SEA Games stipend.