Gibasura sa 5 ka panel judges sa International Criminal Court (ICC) Appeals Chamber pinaagi sa “unanimous” nga desisyon ang hangyo nga interim release o temporaryong kagawasan ni kanhi Presidente Rodrigo Duterte kagahapong adlawa, Biyernes, Nobyembre 28. Gibasa ni ICC Appeals Chamber Presiding Judge Luz del Carmen Ibáñez Carranza ang maong desisyon.
Gipamatud-an sa Appeals Chamber ang desisyon sa Pre-Trial Chamber I, nga una nang gibalibaran ang panghangyo sa kanhi Presidente para sa interim release, diin nakita nga kinahanglan ang padayon nga pagkabilanggo sa kanhi Presidente sa Pilipinas. Apan, gihangyo kini sa kampo sa kanhi Presidente, nga nag-ingon nga ang Pre-Trial Chamber I napakyas sa pagtimbang-timbang kung adunay flight risk o posibilidad nga molayas ang kanhi Presidente samtang padayon nga pagpasaka og kaso na may kalambigitan sa crimes against humanity.
Sa wala pa kini, gisalikway ang katungod sa kanhi Presidente nga moapil sa pagbasa sa desisyon bahin sa iyang interim release request, ug gisugo ang iyang lead counsel nga si Nicholas Kaufman nga mo-representa kaniya ug paminawon ang desisyon sa Appeals Chamber.