Gipahibalo ang katawhan sa Kitaotao sa delikadong kahimtang sa alternatibong dalan sa Sitio Tres Marias, White Kulaman, nga gigamit sukad nahugno ang yuta niadtong Oktubre 18 sa Sitio Kipolot, Palacapao, Quezon, Bukidnon.
Ang maong dalang bukid gireklamo sa katwhan nga taas, pi-ot, ug lapok, nga delikado ilabi na kon mag-ulan. Sumala sa mga motorista, danglog ang dalan ug lisod agian bisan sa mga four-wheel drive, samtang mas peligroso para sa mga gagmay o hinay nga sakyanan.
Tungod niini, ang Sangguniang Bayan sa Kitaotao mipasa ug resolusyon nga naga-awhag sa DPWH regional office ug Bukidnon 2nd District Engineering Office nga susishon ang maong ruta ug pas-pasan ang pagtukod sa luwas nga detour dapit sa “Overview” section sa BuDa highway sa Palacapao.
Sumala ni Kitaotao Vice Mayor Mary Ann G. Angit, nga bise-presidente usab sa Vice Mayors’ League of the Philippines–Bukidnon, ang Puntian–Sinuda via White Kulaman bypass road, ilabi na ang Tres Marias stretch, peligroso panahon sa ting-ulan ug nakapaminos sa pagtransport sa mga produkto ug turismo sa lugar.
Usa ka video nga mikaylap sa social media nagpakita sa usa ka sakyanan nga gibira sa bulldozer human milubong sa lapok nga bukid, samtang uban pang biyahe nanginahanglan ug rescue assistance. Mas grabe pa ang sitwasyon human malagpot ang usa ka dump truck sa pangpang sa Sitio Kumong ni Pagong, White Kulaman, diin namatay ang drayber nga empleyado sa lokal nga pangagamhanan, human kini migawas nga nisaka ang iyang blood pressure.
Si DPWH Secretary Vince Dizon, atol sa iyang pagbisita sa Palacapao, mipahayag nga gikinahanglan una ang teknikal nga geological assessment sa lugar sa dili pa ipahimutang ang pormal nga detour, ug ang slope stabilization na mahimong molungtad ug pila ka bulan tungod sa peligrosong kabukiran.
Samtang naghulat pa sa permanente nga solusyon, nagbutang na ang DPWH Bukidnon 2nd District Engineering Office ug temporaryong pedestrian stairway nga may railings ug solar lights aron matabangan ang mga molabang nga residente.
Sa pagkakaron, nagpadayon gihapon ang paggamit sa Puntian–Sinuda–White Kulaman bypass road, apan gipasidaan ang mga motorista nga mag-amping labi na kon mag-ulan tungod sa padayon nga hulga sa lapok ug pagkadanglog sa yuta.