Gisugyot sa lokal nga kagamhanan sa syudad sa Valencia City ang posibleng pagpahigayon og random drug testing sa kapulisan sa dakbayan.
Sa eksklusibong pakighinabi ni Jun Galario, kanhi mayor ug kasamtangang konsultant sa LGU-Valencia City, gisugyot niini ang random drug testing sa mga sakop sa kapulisan sa dakbayan aron mapalig-on ang integridad ug kredibilidad sa mga nagpatuman sa balaod.
Matud ni Galario, nga ang maong panukiduki makatabang aron malikayan ang posibilidad nga adunay mga opisyal sa kapulisan nga malambigit sa illegal nga kalihokan, samtang gipalig-on usab ang kampanya batok sa droga.
Dugang pa niini, gisugyot nga makanunayong ipaubos usab sa drug testing ang mga empleyado sa lokal nga panggamhanan, aron mapakita ang patas nga pagpanglimpyo sa serbisyo publiko.
Samtang, sigon usab niini nga misaka usab ang kaso sa nagpayuhot sa illegal nga droga sa dakbayan diin matag semana adunay mga nadakpan sa maong kaso, apan matud niini nga ang sunod-sunod nga pagkasikop sa mga dinakpan usa ka timaan sa kusog ug padayon nga operasyon sa mga otoridad sa syudad.
Sa laing bahin, miluwat usab si Galario, nga adunay gitagana nga P150 milyon nga pondo alang sa assistance sa mga law enforcement units sama sa kapulisan ug Philippine Army, lakip na ang gastohon sa panggasolina ug operasyon sa mga kalihokan nga adunay kalabotan sa seguridad ug kalinaw sa Valencia City.