QUEZON, BUKIDNON – Hingpit nang nakaplagan ang patayng lawas sa magtiayong Ubatay lima ka adlaw human sila mahanaw atol sa nahitabong landslide niadtong Domingo, Oktubre 19, 2025, sa Overview, Sitio Kipolot, Quezon, Bukidnon.
Sa eksklusibong pakighinabi sa Bombo Radyo Malaybalay atol sa programang Zona Libre kay Anecito Torayno, Jr., Operations Chief sa Provincial Disaster Risk Reduction and Management Office – Bukidnon, nga nakaplagan ang mga patayng lawas sa magtiayon nga naggakos duol mismo sa dapit diin nakita usab ang ilang bao-bao pipila na ka adlaw.
Matod pa ni Torayno, sa wala pa sila nakit-an, gibantayan na sa mga rescuer ang lugar tungod kay adunay mga senyales gikan sa duha ka K9 dogs nga posible anaa ra sa maong dapit ang mga biktima.Posible usab nga nasuffocate ang magtiayon gumikan adunay gamay nga espasyo sa ilang nahulugan.
Ang kalawmon sa ilang nahimutangan miabot ug 150 meters, hinungdan nga lisod silang makit an dayon tungod usab sa padayon nga pagdahili sa yuta.Gipasalamatan usab ni Torayno ang tanang mga rescuers nga walay pu-as sa pagpangita hangtod sa ilang pagkakaplag sa mga biktima.
Gipahimangnoan sab niini ang katawhan sa Bukidnon nga mag-amping pirmi, ilabi na karon nga padayon ang pagbundak sa ulan ug ang probinsya usa sa mga lugar nga prone sa landslide.