Gisupak sa mga negosyante ang gisugyot ni DPWH Secretary Vince Dizon nga mahimong molungtad pa og duha hangtod lima ka bulan ang pagbuhat sa access road sa Quezon, Bukidnon.
Sa eksklusibong pakighinabi sa Bombo Radyo Malaybalay kang Forts Cabarde, Public Information Officer sa LGU Quezon, nga matud pa sa pamahayag ni Sec. Dizon, ang maong rehabilitation magkinahanglan og 2 ngadto sa lima ka bulan gumikan adunay pa’y ipahigayon nga soil testing.
Samtang miluwat usab si Gobernador Oneil Roque, nga posibleng molungtad pa og lima ka tuig aron hingpit nga makumpleto ang giplanong estruktura.
Apan giklaro ni Ray Talimio Jr., kanhi miyembro sa Oro Chamber ug sa Economic Development Committee sa Regional Development Council-X, nga posible nga nasayop lamang sa pagsulti si Gobernador Roque ug posibleng gipasabot niini mao ang lima ka bulan, ug dili lima ka tuig.
Matud pa ni Talimio, kinahanglan nga i-fast track ang rehabilitation gikan sa duha ka bulan ngadto sa duha ka semana o labing menos 60 hangtod 90 ka adlaw pinaagi sa 24/7 nga trabaho aron mapugngan ang mas dakong pagkawala sa kita sa rehiyon.
Gibutyag niini, nga kung aduna nay tukmang computation kung pila ang lugi nga maangkon sa ekonomiya sa Region 10 ug apil na, diin gikatahong sa inisyal nga pagbanabana gikaingong posibleng moabot og 1 milyon pesos matag adlaw, maghimo sila og position paper aron maipaabot sa Office of the President.
Gidugang usab niini, nga dili lamang ang katawhan ang apektado, kundili lakip na usab ang tanang sektor sa negosyo nga nag-antos tungod sa dugay nga implementasyon sa maong pag-ayo sa dalan o pagbuhat og access road.