Aduna nay person of interest ang kapulisan kalabot sa insidente sa pagpamusil batok kang 3rd District Board Member sa Bukidnon nga si Jomic Fortich ug sa iyang pamilya. Sumala sa impormasyon nga nadawat sa Bombo Radyo Malaybalay gikan kang PLTCOL Erwin Rais Naelga, hepe sa Quezon Municipal Police Station, kalit lang gipaulanan og bala ang pamilya ni Fortich samtang kini nagpahigayon og panagtigom sa Barangay 11, Poblacion, Quezon, Bukidnon.
Matod sa otoridad, posibleng yuta ang kalambigitan sa maong insidente, apan padayon pa ang ilang imbestigasyon aron makuha ang dugang ebidensya ug matumbok ang suspetsado. Gipasabot usab sa kapulisan nga luwas ang pamilya ni Board Member Fortich ug walay natala nga samdan o casualty atol sa maong pagpamusil, bisan pa man nga nagpabilin ang trauma sa pamilya.
Dugang pa, gipasabot ni PMaj. Jayvee Babaan nga wala pay nakitang basiyo sa bala sa lugar sa insidente, apan padayon ang koordinasyon sa Quezon Municipal Police Station aron mahibal-an ang motibo ug maila ang mga responsable. Nahitabo ang gikaingong pagpamusil niadtong Oktubre 16, 2025, pasado alas 12:15 sa udto.