Gipahayag sa lokal nga konseho sa Dakbayan sa Malaybalay ang kabalaka sa padayon nga kakulang sa suplay sa tubig nga nakaapekto sa daghang konsumante, hinungdan nga gipalihok ang panaghisgot sa posibilidad sa pagpasulod ug bag-ong private supplier aron mas mapalambo ang serbisyo sa panubig sa syudad.
Sa pakighinabi sa Bombo Radyo Malaybalay kang Engr. Nolito Binahon, manager sa Malaybalay Water District (MWD), iyang gibutyag nga giplano karon ang pagpaayo sa bulk water supply human mapakyas ang Prime Water nga makakompleto sa gisaad nga water source project.
Tungod niini, nangita ang MWD ug laing private entity nga mahimong partner sa suplay sa tubig ug giila niini ang Hanabana Level III Water System isip posibleng bagong water supplier sa Malaybalay. Gipasabot ni Binahon nga ang Hanabana maghatag og dugang treatment plant ug water sources aron ma-augment o madugangan ang suplay sa tubig nga maabot sa mga konsumante.
Gilauman sa mga opisyal sa Malaybalay nga pinaagi sa maong kolaborasyon, mapadayon ang lig-on ug limpyo nga suplay sa tubig sa dakbayan samtang ginasiguro nga maprotektahan gihapon ang interes sa mga konsumante.