Usa ang patay ug duha ang naangol human gisulayan og massacre ang usa ka pamilya sa Barangay Halapitan, San Fernando, Bukidnon pasado alas-10 sa gabii, Oktubre 14, 2025. Sa pakighinabi sa Bombo Radyo Malaybalay, giklaro ni Police Executive Master Sergeant PEMS. Rael M. Ganadillo, Chief Investigator sa San Fernando Police Station, nga personal nga panagbangi ang posibleng hinungdan sa insidente tungod kay magsilingan ang biktima ug suspetsado.
Ang maong insidente nagresulta sa kamatayon sa usa ka inahan ug pagkasamad sa duha pa ka miyembro sa pamilya. Sumala sa inisyal nga imbestigasyon sa kapulisan, pugsanong misulod sa balay sa mga biktima sa Sitio Sulog ang suspek nga giila lamang sa alyas Gardo. Gamit ang kalibre 45 nga pistola, gipusil niini ang mga biktima nga sila si Rutchell Lasponia Amad, 32 anyos, nga namatay sa samad-pinusilan sa nawong, abaga, ug liog; si Jorniel Amad, 34 anyos, ug ang 12-anyos nga si alyas Biboy nga samaron sa lain-laing parte sa lawas.
Human sa krimen ang suspetsado, dali kining miikyas ug gipaulanan pa og bala ang balay sa mga biktima sa makadaghang higayon. Nagpahigayon karon og hot pursuit operation ang San Fernando PNP aron masikop ang suspek ug matino ang motibo sa maong pagpamusil nga nakapahadlok sa komunidad