MALAYBALAY-Gidala sa balay tambalanan ang 4 ka mga indibidwal human nga naaksidente sa kalsada ang mga biktima diin nahitabo sa Brgy Casisang, Malaybalay City Bukidnon.
Base sa imbestigasyon sa Malaybalay PNP , nawad-an og preno ang 1 ka forward truck closed van rason nga nadaro niini ang 5 ka balay nga anaa sa daplin sa dalan.
Subay sa imbistigasyon sa Traffic Management Center (TMC), pasado ala 1:20 sa kadlawon, Abril 11, 2025, mibyahe ang maong van diin pag-abot sa kurbadahang dalan nawad-an og control ang driver.
Nasayran nga ang nahisgutang van gikan sa dakbayan sa Cagayan De Oro, padulong sa Valencia diin nagkarga kini og mga dry goods.
Samtang ang driver ug 2 niini ka kauban, nakaangkon og daghan samad sa kalawasan.
Samtang luwas ra usab ang 1 ka lalaki nga anaa sulod sa panimalay diin nakaangkon kini og ubay-ubay nga samad sa kalawasan ug gilayong gidala sa Bukidnon Provincial Medical Center.
Sa laing bahin, wala pa masuta og pila ang kantidad sa danyos sa aksidente.
Pahimangno usab sa TMC Malaybalay nga kanunay magbinantayon sa kadalanan ug strikto usab ilang pagpatuman sa random checkpoints sa dakbayan.