Gipaabot sa Ciy Agricultures office nga mas mudako ang ginansya sa mga mag-uuma sa syudad human ipahibalo nga gitaasan na ang presyo sa palit sa humay sa National Food Authority (NFA) gikan sa ₱14 ngadto sa ₱17 matag kilo.
Sa eksklusibong pakighinabi sa Bombo Radyo Malaybalay kay Engr. Lilianne Obre, Acting Assistant sa City Agriculture Office. Pinaagi sa bag-ong executive order, gisugdan na sa NFA ang pagpamalit sa humay sa mas taas nga kantidad aron mas masuportahan ang kita sa mga lokal nga mag-uuma.
Sa miaging presyo nga ₱14, matud pa ni Obre, igo ra gyud kini sa pagbawi sa gasto sa produksiyon ug halos walay nabiling kita ang mga mag-uuma. Apan karon, dako na ang posibilidad nga makaginansya sila pinaagi sa bag-ong presyo nga gitakda sa gobyerno.
Sa laing bahin, giila usab nga bastante ang suplay sa bugas sa syudad sa Malaybalay. Gani, mas sobra pa kini kumpara sa panginahanglan sa populasyon. Base sa datos, adunay kapin 5,987 ka ektarya sa kahumayan ang syudad nga aktibong nagaproduce og humay.
Ang lakang gilauman nga usa ka dakong tabang aron mapalambo ang kahimtang sa agrikultura sa syudad ug paghatag ug interes sa mga mag-uuma sa padayong pagpanguma