Matagamtaman sa Asador Aupa sa Spain ang labing mahal ug eksklusibong burger sa kalibutan nga mibalor og $11,000 o mga ₱647,000.
Ang maong “perfect burger” bunga sa walo ka tuig nga panukiduki ug eksperimento, ug matilawan lamang pinaagi sa usa ka imbitasyon.
Ang Asador Aupa, usa ka Basque-cuisine eatery sa Cabrera del Mar, Catalonia, diin nagpabiling tinago ang eksaktong mga sangkap o sagol sa maong pagkaon apan gipasabot nga ang presyo gibase sa kahusay sa mga sagol, katalagsaong dining experience, ug eksklusibong serbisyo.
Kini nga burger giisip nga usa ka “luxury gastronomic experience”, diin dili lang pagkaon apan usa ka curated event alang sa piling mga bisita.
Limitado matud pa ang produksyon ug matag serving niini nga naggamit sa talagsaong karne ug keso sa Europa, uban sa espesyal nga sauce nga gisagulan og mamahalon nga bino.
Ang presyo, dili lang para sa pagkaon mismo kondili para sa tibuok kasinatian nga giandam alang sa mga tinahod nga bisita.