Nakit-an na ang usa sa mga patay’ng lawas sa mga missing victims sa nahitabo nga pagbaha sa Valencia City.
Giila ang biktima nga si Dina Niva Consolacion, 48 anyos, minyo, ug lumulupyo sa Purok 13, Valencia City, Bukidnon.
Base sa imbestigasyon, alas 11:05 sa buntag sa Oktubre 4, 2025, nakadawat og tawag ang Maramag Municipal Police Station gikan sa usa ka residente og gikatahong adunay nakita nga patay’ng lawas sa Purok 7, Dologon, Maramag, Bukidnon.
Pag-abot sa mga otoridad, nakumpirma nga ang biktima mao si Consolacion ug gibutang na kini sa cadaver bag sa mga rescuers gikan sa Valencia City ug Quezon, Bukidnon.
Gikaingon anaa na sa advanced stage of decomposition ang lawas sa biktima. Ang nakaplagang patayng lawas usa sa mga missing persons nga natala sa Valencia City MDRRMO human sa kusog nga pagbaha nga nahitabo sa syudad niadtong Setyembre 17, 2025.
Gituohan nga gidala sa kusog nga bul-og sa Pulangi River gikan sa kasadpang bahin sa Valencia City ang biktima, hangtod kini nakit-an sa Maramag.
Samtang, sa ika-17 ka adlaw sa search and retrieval operations nga gihimo sa CDRRMO ug nagkadaiyang volunteer groups, nagpabilin nga wala pa makit-i ang lawas sa duha pa ka missing victims nga sila Johnny Borbon, 63 anyos, ug Andrea Vistal, 2 anyos.
Padayon ang koordinasyon tali sa mga ahensya aron mapadali ang pagpangita ug matino ang eksaktong lokasyon sa uban pang wala pa makit-i nga mga biktima.