Aron mapadayon ang kalimpyo ug kalinaw sa syudad gipakusgan sa City ENRO ang kampanya batok sa basura pinaagi sa pagawhag sa katawhan sa recycling, waste segregation ug responsableng paglabay sa basura.
Sa exsclusibong pakighinabi sa Bombo Radyo Malaybalay kay Jessie Suson,Cenro Head, nga importante nga magtinabangay ang tanang residente sa pagsegregate sa ilang basura aron malikayan ang sobra nga basura nga mosulod sa landfill area.
Gidasig usab sa CENRO ang publiko nga i-recycle ang mga magamit pa nga basura aron mapagamyan ang basura nga itambog.
Usa kini ka paagi sa pagpanalipod sa kinaiyahan ug sa pagpadayon sa kahapsay sa solid waste management sa Malaybalay.
Dugang pa ni Suson, gihangyo ang mga residente nga mananom og kahoy aron makatabang sa pagpreserba sa preskong hangin ug pagpakunhod sa epekto sa climate change.
Sa laing bahin nagpasidaan ang CENRO nga adunay multa nga P500 ug citation ticket ang mga panimalay nga dili magsegregate sa basura samtang kadtong manglabay og basura bisan asa pagasilotan og P3,000 subay sa City Ordinance No. 962.