Pasakaan og kasong tax evasion ang mga contractor nga nalambigit sa giingong maanomaliyang flood control projects, sigon ni Senate Minority Leader Alan Peter Cayetano.
Matud sa senador, dugay matapos ang mga kasong plunder o graft batok niini, apan posible gihapon nga mag-atubang og silot ang mga tiwaling contractor pinaagi sa aspeto sa buhis.
Gibarugan niini, nga ang Bureau of Internal Revenue (BIR) kinahanglan mag-imbestiga ug mo-audit sa mga contractor nga nakadawat og bilyon-bilyong pondo gikan sa mga kuwestiyonableng proyekto.
Gisulti sa senador nga napadala na ang sulat sa BIR aron pangutan-on kon adunay Letters of Authority kon (LOA) nga gi-isyu batok sa mga maong kumpanya sulod sa milabayng tulo ka tuig.
Ang LOA maoy nagahatag og otoridad sa mga revenue officer aron susihon ug i-audit ang mga record sa accounting sa usa ka taxpayer, aron masuta ang ilang tukmang obligasyon sa pagbayad og buhis.
Dugang pa ni Cayetano, importante kini nga estratehiya aron dili makaikyas sa ilang tulubagon ang mga responsable sa mga ghost projects, bisan pa man ug madugay o mapugngan ang kaso sa katiwalian.