Gipakusgan sa Police Regional Office 10 (PRO-10) ang implementasyon sa programa batok sa pagpanglusot ug pagpamaligya sa smuggled cigarettes sa rehiyon.
Matud ni Police Major Joann Navarro, tigapamaba sa PRO-10, nagpabilin nga usa ka dako nga hagit sa kapulisan ang pagpakgang samga illegal nga sigarilyo.
Sa pinakabag-ong operasyon, nakumpiska sa mga otoridad sa Laguindingan, Misamis Oriental ang mga smuggled cigarettes nga gibanabana nga nagkantidad sa P7 milyon.
Sa laing operasyon sa Valencia City, Bukidnon, nakumpiska usab ang illegal nga sigarilyo nga nagkantidad og P2 milyon.
Dugang pa ni Navarro, nga ang mga kasagarang nakumpiska gikan sa mga drayber, mga pahinante, ug gibaligya sa mga gagmay ng a mga tindahan.
Gipahimangnoan sa PRO-10 ang publiko, hilabina ang mga tag-iya sa gagmayng tindahan, nga ang pagpamaligya sa smuggled cigarettes usa ka klarong paglapas sa balaod nga adunay mga silot kung masapon.
Gipasalig usab sa kapulisan, nga magpadayon ang operasyon ug inspeksyon aron mapugngan ang pagsulod ug pag-apod-apod sa mga illegal nga produkto sa rehiyon.