Nagpagula og tubag ang Malakanyang sa mga kritisismo isip depensa mahitungod sa wala paglakip ni Pangulong Ferdinand “Bongbong” Marcos Jr. sa iyang State of the Nation Address kon (SONA) ang isyu sa pagpakigbatok sa online gambling.
Sumala ni Palace Press Officer Claire Castro, dili basta-basta o magpasagad ang Presidente sa paghimo og desisyon, diin ginasusi pa karon kon maayo ang posibilidad nga ipatuman ang total ban sa online gambling.
Gipasabot niini nga adunay dakong kontribusyon sa kaban sa goberno ang mga kita nga nagagikan sa mga lisensyadong online gambling sites, nga mapuslan usab sa serbisyo publiko.
Gihisgutan usab ni Castro ang nahitabo sa panahon ni kanhi Pangulong Rodrigo Duterte, nga bisan pa sa ipatuman nga pagdili sa online sabong, misamot hinoon ang kalapad sa mga iligal nga online sabong sites.
Kahinumduman nga adunay mga gisugyot nga balaodnon nga gisumite na sa Senado aron bawalan ang online gambling.
Gawas pa niini, may mga grupo usab ug mga sektor, lakip na ang simbahan, nga nanawagan sa goberno nga buhion ang lakang nga ipahunong na kini gikan sa kadaot nga dala niini sa katilingban.
Bisa paman, padayon pa ang diskusyon ug konsultasyon bahin sa maong isyu.