Nagbahad si Presidente Ferdinand Marcos Jr. nga dili niini aprobahan ang gisugyot nga 2026 national budget kon kini dili mohaom o mo-angkla sa mga development goals sa goberno alang sa katawhang Pilipino.
Matud pa sa Pangulo, lig-on ug klaro ang iyang baruganan sa maong isyu, ug bisan pa man og magresulta kini sa paggamit og reenacted budget para sa sunod nga tuig, andam siya nga barugan kini alang sa kaayohan sa tanan.
Ang National Expenditure Program (NEP) nga gi-propose sa gobyerno para sa 2026 nagkantidad og PhP6.7 trilyon, apan gipasabot sa Pangulo nga dili lang kadak-on sa budget ang gikinahanglan, kundili ang tukmang paggamit niini alang sa tinuod nga kalambuan sa nasud.
Gipasiugda ni Marcos nga ang pondo sa goberno kinahanglan gamiton sa hustong paagi aron makahatag og trabaho, serbisyo, ug proteksyon sa katawhan, ug aron matukod ang usa ka lig-on ug malungtarong ekonomiya nga mapuslan sa tanang Pilipino.
Gibaharan usab niini ang mga opisyal nga nalambigit sa iyang giingong naghitak nga kurapsyon sa mga proyekto sa flood control sa nasud.
Gibug-atan sa Pangulo nga ang maong mga buhat dili lang yano nga pagpangawat sa kwarta sa goberno, apan usa usab kini ka klase sa pagpugong sa kaugmaon sa mga Pilipino.
Matud pa niya, ang mga opisyal nga nalambigit sa maong kalihukan angayng maulaw sa mga pamilyang pirming nabaha tungod sa kakulang sa epektibo ug matinud-anong mga proyekto nga panglikay sa pagbaha.
Gidugang pa niya nga ang mga bata o kabatan-onan ang mahimong mopasan sa utang nga resulta sa sayop ug corrupt nga paggamit sa pondo nga gitagana unta para sa kaluwasan ug kaayohan sa kadaghanan.
Gipasalig usab ni Pangulong Marcos nga dili siya mohunong hangtod mapahawa ug mapanagot ang mga tiwaling opisyal sa gobyerno nga nagpadayon sa pagpahimulos sa pondo alang sa ilang kaugalingong interes.
Gitumbok niya nga kini nga klase sa sistema mao’y usa sa mga dakong babag sa tinuod nga pag-uswag sa Pilipinas.
Sa pagtapos sa iyang pahayag, nanawagan siya sa tanang ahensya sa gobyerno nga magpakabana ug magpakita og integridad, ilabi na sa pagtuman sa ilang katungdanan alang sa katawhan ug sa umaabot nga henerasyon.