Gikwestyon sa pipila ang deklarasyon sa Korte Suprema nga “unconstitutional” ang impeachment batok kang Bise Presidente Sara Duterte.
Matud ni Atty. Proculo Sarmen, Legal Counsel sa Federation of Free Workers, ang impeachment dili angay gamiton isip instrumento sa politikal nga interes.
Base sa obserbasyon sa abogado, usa sa mga motibo sa pagpangusog sa impeachment mao ang pagpugong kang Bise Presidente Duterte sa pagdagan isip pagka-Presidente sa 2028.
Tungod niini, sunod-sunod ang pagsang-at sa impeachment nga miresulta sa wala pagsunod sa proseso nga gilatid sa Konstitusyon.
Giklaro usab ni Atty. Sarmen, nga ang desisyon sa Korte Suprema nagpamatuod sa ilang pagka-independenteng institusyon nga mosunod sa rule of law bisan pa sa mga kritisismo ug panawagan sa publiko.
Subay sa desisyon, miluwat ang abogado nga duna pay higayon ang pipila sa subling pagsang-at usab og impeachment case sa Pebrero 2026, apan gihisgutan nga lisod na kini usbon tungod unanimous ang desisyon.
Dugang pa sa abogado, nga maong desisyon sa Korte Suprema usa ka pahimangno nga ang legal nga proseso kinahanglan sundon ug ang mga institusyon sa gobyerno dili gamiton alang sa personal o politikal nga tinguha.
Giklaro ni Atty. Sarmen, nga teknikal nga aspeto sa proseso ang basihanan sa desisyon, ug dili kini nakasentro sa personalidad o politika.
Sumala sa abogado, gawas sa paglapas sa “one-year ban rule,” nasuta sa Korte Suprema nga wala kini mosubay sa tukmang legal nga proseso.
Dugang pa ni Sarmen, wala nay lig-on nga batakan ang mga supak sa desisyon sa korte.
Bisan pa niana, iyang gipasabot nga kung gusto sa mga misang-at nga matangtang sa serbisyo ang Bise Presidente, aduna pa silay opsyon nga mopasaka og bag-ong mga sumbong o mudagan sa 2028 aron kini ilang kontrahon sa eleksyon.
Subay niini, mituo si Atty. Sarmen, nga positibo ang epekto sa maong desisyon kung seryoso ang tanang opisyalis sa pagpalambo sa nasud, ug dili gamiton ang ilang katungdanan alang sa personal nga interes o pagpangdaot sa uban.