Nagpabiling wala mailhi ang nasunog nga patay’ng lawas sa usa ka lalaki nga nakaplagan sa likod sa usa ka panimalay sa Purok 4B, Barangay Aglayan, Malaybalay City pasado alas 6:00 sa buntag, Hulyo 22. Kasamtangang anaa pa kini sa Villanueva Funeral Homes.
Sa pakighinabi sa Bombo Radyo Malaybalay, gibutyag ni Barangay Kagawad Jayvee Candilasa nga nakadawat sila og tawag alas 6:30 sa buntag gikan sa silingan nga nakakita sa lawas. Matod sa pamilyang Gabihon, tag-iya sa balay, nadungog nila ang pagbuto ug kasaba sa iro pasado alas 3:00 sa kadlawon, apan wala nila kini tagda.
Sa laing pakighinabi, gibutyag ni Police Executive Master Sergeant Ken Hanzel Bughaw nga posible nga nagpakamatay ang biktima, apan padayon pa ang imbestigasyon.
Gipahibalo usab ni PMaj Jayvee Babaan ang tigpamaba sa Bukidnon Police Provincial Office nga nabilin ang coin purse, tsinelas, medyas, ug botelya nga adunay gasolina, samtang ang cellphone nasunog usab. Ginasusi pa ang CCTV sa palibot aron matino ang tinuod nga nahitabo.