Patay 27 ka indibidwal ug sobra 170 ang samaran sa nahagsa nga fighter jet sa Bangladesh Air Force sa Milestone School and College, usa ka pribadong tunghaan sa Dhaka.
Ang mga biktima mga batang estudyante nga bag-o pa nakapauli gikan sa klase sa dihang natigayon ang aksidente.
Ang nahagsang eroplano diin usa ka Chinese-made F-7 BJI jet.
Matod sa militar, ang piloto nga si Flight Lieutenant Towkir Islam anaa sa usa ka training mission ug nakasinati og mekanikal nga problema.
Napamatud-an usab nga kini ang iyang unang solo flight, base sa giingon sa iyang uyuan.
Gipaninguha sa piloto nga ilikay ang eroplano gikan sa daghang tawo, apan napakyas kini ug mibangga sa bilding sa tunghaan.
Ang mga nasamdan kasagaran mga bata nga anaa sa edad 8 hangtod 14 anyos.
Samtang pito ka patayng lawas ang wala pa maila.
Daghang mga paryente ang midagsa sa ospital, samtang ang mga boluntaryo mipahigayon og blood donation drive.
Nagdeklara na ang gobyerno sa national mourning karong Martes tungod sa insidente.
Nagpahayag usab sa iyang simpatiya si Indian Prime Minister Narendra Modi, nga misulti nga andam motabang ang India sa mga gikinahanglan.
Kini nga trahedya giisip nga pinakagrabe nga aviation disaster sa Bangladesh sukad pa sa 1984, diin 49 ang namatay sa usa ka commercial flight crash.