Gipang-ibot ug gipangsunog sa mga otoridad ang mga tanom sa marijuana nga gibana-banang mokantidad og kapin P366,000 atol sa anti-drug operation sa Purok 3, Barangay Lourdes, Valencia City pasado alas 8:30 sa buntag niadtong miaging adlaw.
Sa pakighinabi sa Bombo Radyo Malaybalay, gipadayag ni IOV Laila A. Abad sa PDEA-10. Gipamatud-an niini ang maong taho ug narekober ang 100 ka binhi sa marijuana nga gibana-banang nagkantidad og ₱4,000, duha ka plastik nga tray, 10 ka hamtong nga tanom nga nagkantidad og ₱2,000, ug 3 ka kilo sa uga nga marijuana nga nagkantidad og ₱360,000 (₱120 matag gramo).
Gisunog dayon sa lugar ang tanang nakumpiskar nga dahon gawas sa pipila ka representative samples nga ipasa sa Bukidnon Provincial Forensic Unit sa Malaybalay alang sa laboratory examination.
Padayon karon ang imbestigasyon sa mga otoridad aron masuta ang mga responsable sa illegal nga pagpangtanom sa marijuana sa maong lugar.