Nag-atubang na sa kaso sa pagpanglugos ang usa ka batan-ong akusado nga giilang kabahin sa most wanted list sa Bukidnon human masikop sa operasyon sa Valencia City.Nasikop sa kapulisan si Loyjun Cartagina y Petallar, 20 anyos, walay trabaho, ug residente sa Purok 4, Brgy. Lourdes, Valencia City, Bukidnon niadtong Hulyo 16, 2025 sa alas 4 sa hapon sa Purok 8, Brgy. Barobo, Valencia City.
Si Cartagina mao ang Top 8 Most Wanted Person (Provincial Level) ug gipasakaan og 3 ka kaso sa pagpanglugos ubos sa RPC Art. 226-A ug 226-B(1), nga walay rekomendadong piyansa, base sa Warrant of Arrest nga gi-isyu kaniadtong Mayo 22, 2023.
Sa laing bahin usab, sa may Libona, Bukidnon, nasikop usab si alyas Gogong, 27 anyos, residente sa Camp 14, Santa Fe, kagahapong adlawa Hulyo 18, 2025 sa Sitio Danao Palabucan.
Si Gogong nag-atubang sa kasong Statutory Rape ubos sa warrant nga gi-isyu sa RTC Branch 11, Manolo Fortich, nga walay gerekomendang piyansa . Anaa na sa kustodiya sa kapulisan ang duha ka akusado alang sa tukmang legal nga proseso.