Mukabat na kapin kon kulang 30 milyones ang nakompiska nga smuggled nga sigarilyo sa tibuok rehiyon lakip na niini ang syudad sa Malaybalay.
Matud ni Police Major Joann Navarro, tigpamaba sa Police Regional Office 10, nakompiska ang mga illegal nga sigarilyo sa mga operasyon sama sa checkpoints ug hilabi na sa confiscation sa mga gagmayng nga tindahan.
Gipadayag ni Navarro, nga lakip na sa operasyon ang tanang matang sa illegal nga buhat sama sa illegal nga droga, illegal mining, mga illegal nga armas ug operasyon sa pagpanalipod batok sa tanang klase sa krimen.
Giklaro ni Police Major Navarro, nga wala’y pabrika o manufacturer sa illegal nga sigarilyo sa rehiyon.
Gipasabot niini, nga giangkat lang kini gikan sa ubang rehiyon. Apan pinaagi sa mga operasyon sa kapulisan, nakumpiska ang mga illegal nga sigarilyo.
Gani, pinaagi sa checkpoints nasabat ang smuggled nga sigarilyo nga nagkantidad og P20 milyones sa Iligan City.
Subay niini, hugot nga gituman sa PRO-10 ang mando sa nasyonal nga liderato sa 3-5 minute nga pagresponde sa tanang klase sa krimen ug emerhensiya.
Gidugang ni Navarro, nga dili lang ang mga external nga isyu ang ilang gitutokan, apan lakip na usab ang internal nga lihok sa ahensya diin matud pa nga dili pasagdan ang posibleng kalambigitan sa mga miyembro sa kapulisan sa illegal nga kalihokan.
Mipasalig usab si Navarro, nga magpabiling aktibo ang partisipasyon sa kapulisan sa pagpanalipod ug pagsiguro sa kahapsay ug kaluwasan sa komunidad.