Usa ka talagsaon ug gamay kaayong linalang sa dagat ang nakuhanan og hulagway sa Barangay Moog, Laguindingan, Misamis Oriental, nga nakadugang sa mga natural nga bahandi nga ikapasiundayag sa maong lungsod.
Giila kini nga Lembeh Sea Dragon o Kyonemichthys rumengani, usa ka matang sa isda nga may susamang porma sa pipefish ug mokabat lamang og tulo hangtod upat ka sentimetro ang gitas-on.
Si Police Master Sergeant Ederlindo “Dindo” Nueza Jr. ang nakakuha sa hulagway sa maong nilalang atol sa iyang pagsalom sa dagat.
Matud pa niya, lisod kini makita tungod sa panagway niini nga susama sa gagmayng tipik sa mga bato ug sagbot sa ilawom sa dagat.
Samtang, gilakip na sa Department of Tourism Region 10 ang Laguindingan sa dive tourism circuit sa Misamis Oriental aron mapalambo ang turismo, panginabuhian sa mga lumulupyo ug pagpanalipod sa bahandi sa kadagatan.

