Unom ka indibidwal ang nasikop samtang usa ka menor de edad ang na-rescue atol sa operasyon batok sa gidudahang ilegal nga pagmina sa Sitio Pin-as, Barangay Tuburan, Cagayan de Oro City pasado alas 4:00 sa kaadlawon, niadtong milabay’ng adlaw.
Gipahigayon ang operasyon sa Police Regional Office 10 (PRO-10), kauban ang Mines and Geosciences Bureau (MGB) Region 10, isip pagpatuman sa Republic Act 7942 o Philippine Mining Act of 1995 ug sa kasamtangang pagdili sa pagmina sa mga natudlong lugar sa Opol, Misamis Oriental ug daplin sa Iponan River.
Nasakmit sa mga otoridad ang 12 ka excavator, tulo ka dump truck, duha ka trommel, duha ka tow truck, duha ka generator ug usa ka crawler truck nga gibanabanang mokabat sa P45 milyones ang kinatibuk-ang bili.
Ang unom ka dinakpan nag-edad og 18 hangtod 43 anyos ug naggikan sa nagkadaiyang lugar sa Mindanao.
Base sa inisyal nga imbestigasyon, gituohang gitabonan lamang og operasyon sa pagkuha og bato ang ilegal nga pagmina ug giingong gipadagan ug gipondohan sa usa ka Chinese national.