Pito ang namatay samtang 112 ang nasamdan human magbangga ang duha ka tren sa Egypt niadtong Domingo, sumala sa Health Ministry sa nasud.
Matud sa Egyptian National Railways Authority, nahitabo ang panagbangga tali sa estasyon sa Kafr Ammar ug Al-Raqqa sa Giza, duol sa kaulohan sa Cairo, diin nabangga sa usa ka tren ang luyo nga bahin sa laing tren hinungdan sa pagkadiskaril sa pipila ka mga bagon.
Gipadala dayon ang daghang ambulansya aron dad-on sa mga duol nga ospital ang mga nasamdan, samtang gigamit ang dagkong pangalsa aron kuhaon ang nangatagak nga mga bahin sa tren ug malimpyohan ang riles.
Sa 112 nga nasamdan, 45 na ang nakagawas sa ospital human miarang-arang ang ilang kahimtang.
Kahinumduman nga dili na bag-o sa Egypt ang mga aksidente sa tren, diin daghang mga insidente kaniadto ang miresulta usab sa kamatayon sa mga pasahero.