Gipatas-an sa National Food Authority (NFA) ngadto sa P30 matag kilo ang presyo sa pagpalit sa limpyo ug uga nga humay gikan sa mga mag-uuma, lakip ang pagdugang sa gitugot nga mapalit nga humay ngadto sa 500 ka sako matag ting-ani.
Matud ni NFA Administrator Larry Lacson, anaa na sa 80 porsyento sa mga sangang buhatan sa ahensya sa tibuok nasud ang namalit og humay sa maong presyo, samtang P28 matag kilo ang pinakaubos nga paliton niini.
Gikuha na usab sa NFA ang kanhing 200 ka sako nga kinatas-ang limitasyon matag mag-uuma ug gipulihan kini og sukod nga ibase sa abot sa humay sa probinsya ug sa gidak-on sa ilang kaumahan, nga kutob sa lima ka ektarya.
Matud ni Agriculture Secretary Francisco Tiu Laurel Jr., gitumong sa maong lakang nga madugangan ang kita sa mga mag-uuma ug madasig sila sa pagpadayon sa pagpananom bisan pa sa hulga sa kusog nga El Niño.
Gilauman usab nga makatabang kini sa pagpalig-on sa reserba sa bugas sa nasud aron masiguro ang igong suplay taliwala sa posibleng epekto sa grabeng kainit ug hulaw.
Gipasabot sa NFA nga P30 matag kilo ang paliton sa uga nga humay nga adunay 11 hangtod 14 porsyento nga kaumog, samtang mokabat sa P25 hangtod P26 matag kilo ang presyo sa presko pang humay.