Gipabati sa House prosecution panel ang ilang dako nga pagsalig nga makombikto si Vice President Sara Duterte sa nagpadayon nga impeachment trial, base sa mga lig-on nga ebidensya diin lakip na ang iyang Statement of Assets, Liabilities, and Net Worth (SALN).
Sumala kang Kabataan Party-list Representative Renee Co, hingpit ang iyang pagsalig sa mga argumento sa prosekusyon ug naglaum kini nga personal nga motambong ug motubag ang Bise Presidente sa mga alegasyon batok kaniya. Gitataw usab sa prosekusyon nga wala gayud kuwestiyona sa depensa ang pagkatinuod o authenticity sa maong SALN, kundi ang pagdawat lamang niini isip ebidensya tungod sa gipatuman nga confidentiality ug bank secrecy laws.
Sa laing bahin, gipanghimakak ni House prosecutor Representative Terry Ridon ang mga pamahayag ni VP Sara spokesperson Atty. Salvador Paolo Panelo Jr., diin gipasabot ni Ridon nga ang opisyal nga pagdawat sa Senate Impeachment Court sa ilang mga ebidensya nagpamatuod nga wala mapakyas ang kampo sa prosekusyon.