Nakakumpiska og kapin P17.6 milyones nga kantidad sa mga kontrabando ang Police Regional Office 10 (PRO-10), samtang 239 ka indibidwal ang nadakpan atol sa usa ka semana nga operasyon sa tibuok Northern Mindanao gikan Oktubre 26 hangtod Nobyembre 1, 2026.
Base sa report sa PRO-10, 54 ka indibidwal ang nadakpan sa 22 ka operasyon batok sa ilegal nga sugal, diin nakumpiska ang mga gamit nga nagkantidad og P12.2 milyones.
Sa kampanya batok sa ilegal nga droga, 78 ang nadakpan sa 64 ka operasyon, lakip ang pagkumpiska sa kapin 590 gramos nga shabu nga nagkantidad og P4 milyones.
Dugang pa, 15 ang nadakpan sa operasyon batok sa ilegal nga pagmina, samtang 85 ka wanted person ang nasikop, lakip ang 23 nga most wanted persons.
Nakakumpiska usab ang kapulisan og 43 ka armas sa kampanya batok sa loose firearms, diin pito ka indibidwal ang gidakop.