Nakaapekto sa labing menos 18 ka flights sa nagkadaiyang nasud sa Europe ang sunod-sunod nga bomb threats, nga miresulta sa paglangan, pagbalhin sa ruta ug emergency inspections sa mga eroplano.
Lakip sa naapektuhan ang mga biyahe paingon sa Rome, Prague ug Poland.
Gibutang sa hugot nga seguridad ang pipila ka tugpahanan, samtang ang ubang eroplano gi-eskortan sa mga fighter jet sa militar ug gipailalom sa inspeksiyon aron masiguro ang kaluwasan sa mga pasahero ug tripulante.
Nakadugang usab kini sa kalangan sa mga biyahe ug pagbalda sa operasyon sa mga tugpahanan.
Bisan pa niini, wala makit-i ang bisan unsang eksplosibo o kahina-hinalang butang sa mga eroplano nga gisusi. Giklasipikar usab sa mga awtoridad sa United Kingdom ang susamang mga hulga isip malisyosong pagpangilad o hoax, samtang nagpadayon ang ilang pagmonitor sa mga insidente.