Gikwestiyon ni House Lead Prosecutor Representative Gerville Luistro kung makapresentar ba og igong ebidensiya ang kampo ni Vice President Sara Duterte aron tubagon ang mga alegasyon sa wala maipasabot nga kadato niini sa pagpadayon sa impeachment trial sa Senado sa Nobyembre 9.
Sa interbyu, giingon ni Luistro nga duha ang posibleng mahitabo sa depensa: mahimong dili kini mopresentar og ebidensiya o wala kini’y igong ebidensiya nga ikatubag sa mga gipadayag sa prosekusyon.
Matud pa ni Luistro, nagtuo ang prosekusyon nga naglisod ang depensa sa pagpangita og ebidensiya nga makapabulaan sa mga nahisgotang pinansiyal nga kalihokan ug kabtangan ni Duterte.
Lakip niini ang mga rekord gikan sa Securities and Exchange Commission (SEC), Bureau of Internal Revenue (BIR), Anti-Money Laundering Council (AMLC), Land Registration Authority (LRA) ug Philippine National Police-Firearms and Explosives Office (PNP-FEO).
Gipatin-aw usab sa mambabatas nga gibase sa kaugalingong mga dokumento ug deklarasyon sa mga kompanyang nalambigit sa bise presidente ang mga gipresentar nga ebidensiya sa prosekusyon.
Samtang, sumala sa forensic accounting expert nga si Alexander Cabrera, mokabat sa 817.87 milyong pesos ang giila niyang wala maideklarang kabtangan ug dili maipasabot nga kadato nga nalambigit kang Duterte ug sa iyang bana nga si Manases Carpio gikan sa 2022 hangtod 2025.
Bisan pa niini, gipasiugda ni Luistro nga kinahanglan gihapong hatagan og igong higayon ang depensa sa pagpresentar sa ilang mga ebidensiya aron matubag ang mga alegasyon ug mga dokumentong gipadayag sa prosekusyon.