Nakit-ang patay sa usa ka sapa ang 58 anyos nga lalaki, mga 200 metros ang gilay-on gikan sa iyang pinuy-anan sa Purok 9B, Barangay Magsaysay, Kibawe, Bukidnon kagahapong adlawa.
Sumala sa inisyal nga imbestigasyon sa Kibawe Municipal Police Station, nakadawat sila og tawag gikan sa usa ka barangay kagawad kalabot sa nakit-ang patayng lawas sa biktima.
Gikabalak-an na sa pamilya ang pagkawala sa lalaki sulod sa pipila ka adlaw, hinungdan nga ilang gipangita kini hangtod nadiskobrehan ang iyang lawas sa sapa nga kasagarang kuhaan niini og tubig alang sa adlaw-adlaw nga panginahanglan.
Nakit-an usab duol sa lawas ang usa ka itom ug puti nga balde, tsinelas ug upat ka litrong plastik nga galon.
Base sa pagsusi sa kapulisan, walay nakitang timailhan sa foul play sa maong insidente.
Gikumpirma usab sa igsoon sa biktima nga adunay kasaysayan kini sa sakit nga epilepsy o patol.
Kataposang nakita ang lalaki sa iyang pinuy-anan niadtong Oktubre 30, samtang gidala na sa Rural Health Unit ang iyang lawas alang sa eksaminasyon aron matino ang hinungdan sa iyang pagkamatay.