Andam ang kampo sa prosekusyon nga atubangon ang posibleng pagsupak sa depensa ni Vice President Sara Duterte batok sa mga ebidensyang gisumite sa impeachment court, ilabina ang mga rekord nga may kalabotan sa iyang gipasanginlang unexplained wealth.
Matud ni House prosecution spokesperson Congressman Ace Barbers, gilauman na nila nga mokwestiyon ang depensa sa legalidad ug pagdawat sa mga dokumento, lakip ang personal bank records, isip kabahin sa ilang depensa.
Gipahayag ni Barbers nga dokumentaryo nga mga ebidensya ang ilang gisumite ug dili hinimo-himo nga mga dokumento, lakip na ang Statement of Assets, Liabilities and Net Worth o SALN, bank records ug mga rekord gikan sa Anti-Money Laundering Council.
Matud pa sa kongresista, base sa report sa financial forensics expert nga ilang gipangayoan og pagtuki, mikabat sa 817 milyon pesos ang gibanabanang dili maipasabot nga bahandi nga nalambigit sa Bise Presidente.
Gidugang ni Barbers nga kon motestigo mismo si Duterte sa impeachment trial, andam ang prosekusyon nga usisahon siya pinaagi sa cross-examination, ilabina sa iyang sweldo, mga bank account, kompanya ug tinubdan sa kita.