Kumpiyansa ang prosekusyon nga makalahutay sa pagsusi ang mga senador sa mga ebidensyang gipresentar batok kang Vice President Sara Duterte, bisan pa sa pagkuwestiyon niini sa kampo sa depensa.
Gipahayag ni Tingog Party-list Representative Jude Acidre nga gilauman na sa prosekusyon ang pagkuwestiyon sa depensa sa pagdawat, kalabotan ug pagkatinuod sa mga dokumentong gipresentar ngadto sa Senate Impeachment Court.
Matud ni Acidre, ang mga dokumento sama sa Statement of Assets, Liabilities and Net Worth o SALN, mga rekord sa transaksyon sa bangko ug mga dokumento sa buhis mga opisyal nga rekord nga giisip nga regular ug balido hangtod mapamatud-ang dili kini tinuod.
Samtang, may kalabotan sa giingong prenuptial agreement nila ni Vice President Sara Duterte ug Atty. Manases Carpio, nga gipasangil sa depensa nga mahimong makapahuyang sa alegasyon sa unexplained wealth, miingon si Acidre nga wala pa kini mapamatud-i.
Dugang pa niini, kon anaa man ang maong kasabutan, angay matud pa kining gipadayag sa sayo pa, ilabina sa panahon nga gikuwestiyon na ang mga kabtangan ni Carpio.