Balhog sa bilanggoan ang upat ka persona human madakpan sa managlahing operasyon sa kapulisan sa mga lungsod ning lalawigan niadrong milabay’ng adlaw.
Una nang nadakpan sa Kitaotao ang 34-anyos nga si Jonnifer Noynay Lorre, pinaagi sa warrant of arrest alang sa kasong rape nga gipagawas niadtong Hulyo 4, 2014, diin walay rekomendadong piyansa.
Gidakop usab sa San Fernando ang 34-anyos nga si Jeffrey Amas Madaya, pinaagi sa warrant of arrest alang sa kasong qualified theft ubos sa Article 310 sa Revised Penal Code, nga adunay girekomendang piyansa nga 24 mil pesos.
Samtang, duha ka persona ang nadakpan sa managlahing buy-bust operation sa Kitaotao ug Damulog. Nakuha gikan sa 44-anyos nga suspek sa Kitaotao ang tulo ka pakete sa gituohang shabu nga may gibug-aton nga 0.3 gramos ug nagkantidad og 2,040 pesos.
Nasikop usab sa Damulog ang 33-anyos nga suspek, diin nakumpiska gikan kaniya ang duha ka pakete sa gituohang shabu nga may gibug-aton nga 0.2 gramos ug nagkantidad og 1,360 pesos, lakip ang usa ka motorsiklo ug 500 pesos nga marked money.
Giatubang sa duha ka suspek ang kasong paglapas sa Section 5 ug 11, Article II sa Republic Act 9165, samtang ang mga nakumpiska nga droga gidala sa Bukidnon Provincial Forensic Unit alang sa eksaminasyon.
Ang upat ka dinakpan anaa na sa kustodiya sa tagsa-tagsa nilang municipal police station alang sa dokumentasyon ug hustong disposisyon.