Gikuwestiyon ni House Prosecutor ug Representative Terry Ridon ang kinatibuk-ang pagsupak sa defense team ni Vice President Sara Duterte sa mga dokumentaryong ebidensya nga gipresentar sa prosecution kalabot sa nahibiling kaso nga unexplained wealth.
Lakip sa mga gisupak sa depensa ang Statement of Assets, Liabilities and Net Worth (SALN), bank records, insurance documents, ug mga rekord gikan sa Bureau of Internal Revenue ug Anti-Money Laundering Council.
Matud ni Ridon, dili angay tawgon nga fishing expedition ang pagkuha sa maong mga dokumento, nga nahisgotan na kaniadto sa impeachment proceedings ug gilatid usab atol sa cross-examination sa mga testigo.
Gibanabana sa prosecution nga mokabat sa ₱817.87 milyon hangtod ₱1.5 bilyon ang giingong dili maipasabot nga bahandi sa bise presidente.
Bisan pa sa pagsupak sa depensa, gibilin na ni Ridon sa Senate Impeachment Court ang pagdesisyon kon dawaton ba ang mga ebidensya, samtang gikatakdang magpadayon ang impeachment trial sa Nobyembre 9.