Gisaway ni Malaybalay City Mayor Jay Warren Pabillaran ang media ug ang mga nagpakaylap og dili beripikadong impormasyon sa social media, ilabina sa mga isyung wala pa masuta pinaagi sa opisyal nga proseso.
Matud sa mayor, dili angay nga magpadala dayon sa mga impormasyon nga makita sa social media tungod kay wala kini magpailalom sa samang mga lagda sa korte, busa mas maayong susihon una ang kamatuoran ug kon adunay pormal nga reklamo nga gisumite ngadto sa hingtungdang opisina.
Samtang, gipasabot sa mayor nga wala pa makadawat og opisyal nga reklamo ang Opisina sa Mayor sa Malaybalay City kalabot sa maong isyu, ug social media lamang ang gigikanan sa impormasyon sumala sa pahayag.
Gipasabot usab niini nga wala pay pormal nga komunikasyon gikan sa Liga ng mga Barangay President ngadto sa mayor, bisan pa sa mensahe ni Konsehal Manghano pinaagi sa Messenger bahin sa ilang miting ug mga lakang nga gihisgutan.
Tungod niini, gihagit sa mayor nga husayon ang kontrobersiya nga naggikan sa social media pinaagi sa pormal nga proseso, ilabina kon adunay reklamo batok sa mga opisyal sa barangay.
Gipasabot sa pamahayag nga ang quasi-judicial body nga gipangulohan ni Konsehal Ayala adunay hurisdiksiyon sa mga administratibong reklamo batok sa mga napiling opisyal sa barangay, busa angay nga susihon kon adunay opisyal nang reklamo nga gisumite sa iyang opisina.