Nagbahad ang Land Transportation Franchising and Regulatory Board (LTFRB)-10 batok sa mga colorum nga sakyanan nga magbiyahe panahon sa Kalag-Kalag aron mapanalipdan ang kaluwasan sa mga pasahero atol sa Undas.
Sukad pa niadtong Septyembre, nagpadayon ang LTFRB-10 sa pag-inspeksiyon sa mga terminal ug sorpresa nga pagsusi sa mga pampublikong sakyanan sa Northern Mindanao, ilabina sa mga bus ug van nga posibleng walay prangkisa o awtoridad sa pagpasahero.
Gipasidan-an ni LTFRB-10 Regional Director Alexes Joseph R. Bendijo ang publiko nga likayan ang pagsakay sa mga colorum nga sakyanan tungod kay mahimong walay insurance coverage ang mga pasahero kon maaksidente.
Gihangyo usab ang publiko nga ireport ang mga sakyanang sobra sa pasahero pinaagi sa pagkuha sa ilang body number, plaka ug litrato, ug ipadala kini sa Facebook page ni Bendijo o sa LTFRB Region 10.
Sa laing bahin, wala pa’y nadawat nga reklamo kalabot sa sobra nga pamasahe ug wala usab pay petisyon alang sa pagtaas sa plete, busa giawhag ang mga pasahero nga sundon ang fare matrix nga gibutang sulod sa mga sakyanan.
Gipahibalo usab ni Bendijo nga nakigkoordinar ang LTFRB-10 sa kapulisan ug ubang ahensiya aron mapalig-on ang pagbantay sa mga terminal ug mapugngan ang mga kalapasan sa transportasyon panahon sa Undas.