Ipataas sa Malaybalay City Government ngadto sa 500 pesos ang binulan nga allowance sa mga senior citizen nga nag-edad og 70 anyos pataas sugod sa 2027, gikan sa kasamtangang 300 pesos.
Sa pakighinabi sa Bombo Radyo Malaybalay, gipadayag ni Mayor Jay Warren Pabillaran nga ang maong pagtaas resulta sa konsultasyon sa mga senior citizen ug paghisgot niini sa Local Finance Committee aron matagan og igong pondo.
Matod sa alkalde, usa kini sa mga pamaagi sa lokal nga kagamhanan aron masiguro nga mapaminawan ang panginahanglan sa katawhan sa pagplano sa badyet sa dakbayan.
Sa laing bahin, gipaambit usab ni Pabillaran ang iyang nakat-onan sa bag-ohay niyang pagbisita sa Netherlands, ilabina sa aktibong partisipasyon sa mga lumulupyo sa pagplano sa mga programa sa gobyerno nga mahimo usab ipatuman sa Malaybalay.