Gipahugtan sa Malaybalay City Police Station ang seguridad sa mga eskwelahan, ilabina sa Casisang National High School, human makadawat og hulga ang usa ka maestra pinaagi sa dummy social media account.
Gipadayag ni PCol. Ariel Philip I. Pontillas, OIC sa Malaybalay City Police Station, nga gisugdan na nila ang imbestigasyon ug nakig-coordinate sa cybercrime investigators aron mailhan ug matultolan ang naghimo sa hulga. Nag-deploy usab sila og mga kapulisan ug intelligence operatives sa palibot sa eskwelahan, samtang gisusi ang posibleng mga estudyanteng nalambigit sa insidente.
Matud ni Pontillas, anaa na daan ang Safer School Program sa Philippine National Police, lakip ang police visibility matag buntag ug hapon, koordinasyon sa mga school administrator ug pagpatuman sa mga safety drill.
Samtang, naglaom ang kapulisan nga mailhan dayon ang responsable sa hulga. Ang desisyon sa pagpadayon sa klase magdepende sa assessment sa Department of Education.