Tulo ka lalaki ang nadakpan sa duha ka managlahing operasyon batok sa ilegal nga droga sa Valencia City, Bukidnon kagahapong adlawa, diin nasakmit ang 15.4 ka gramos nga gidudahang shabu nga nagkantidad og ₱104,720.
Una nga nadakpan si alyas “Jay-r,” 30 anyos, usa ka trabahante sa konstruksyon ug lumulupyo sa Purok 8, Sitio Pacangan, Barangay Lumbo.
Gipahigayon ang unang operasyon pasado alas 4:56 sa hapon sa maong lugar.
Nakuha gikan sa suspek ang 5.2 ka gramos nga gidudahang shabu nga nagkantidad og ₱35,360.
Samtang, duha pa ka lalaki ang nasikop sa ikaduhang operasyon pasado alas 10:50 sa gabii sa Purok 4, Barangay Kahapunan.
Giila ang mga dinakpan nga sila alyas “Jolly,” 44 anyos, usa ka kontraktuwal nga trabahante sa Department of Public Works and Highways (DPWH), ug alyas “Badong,” 29 anyos, usa ka mag-uuma.
Ang duha susamnag lumulupyo sa Barangay Kahapunan, Valencia City.
Sa maong operasyon, nasakmit ang 10.2 ka gramos nga gidudahang shabu nga nagkantidad og ₱69,360.
Sa kinatibuk-an, mikabat sa ₱104,720 ang gibanabanang kantidad sa gidudahang ilegal nga droga nga nakuha sa duha ka operasyon.
Ang tulo ka suspek anaa na sa kustodiya sa Valencia City Police Station alang sa dugang nga imbestigasyon ug tukmang disposisyon.