Mis samot pa ang kakusog sa Super Typhoon Rosal sulod sa Philippine Area of Responsibility (PAR), sumala sa state weather bureau DOST-PAGASA sa sayong kabuntagon ning Miyerkules.
Kataposang namatikdan ang sentro sa bagyo sa gilay-on nga 990 kilometros sa sidlakan sa Northern Luzon, nga adunay kusog sa hangin nga moabot sa 215 kilometros matag oras ug hapak nga moabot sa 265 kilometros matag oras.
Naglihok ang bagyo paingon sa kasadpan-amihang sa gikusgon nga 30 kilometros matag oras.
Gilauman nga moduol kini sa Extreme Northern Luzon karong Huwebes o Biyernes, sa dili pa hingpit nga mogawas sa PAR sa Biyernes sa gabii o sayong kabuntagon sa Sabado.
Samtang, gipatuman na ang Tropical Cyclone Wind Signal No. 1 sa Batanes, Babuyan Islands ug sa amihanan ug sidlakang bahin sa mainland Cagayan, lakip ang Santa Ana, Gonzaga, Lal-lo, Santa Teresita, Camalaniugan, Aparri, Buguey, Gattaran, Baggao, Peñablanca, Santa Praxedes, Claveria, Sanchez-Mira, Pamplona, Ballesteros, Abulug ug Allacapan.
Gipahimutang usab ubos sa Signal No. 1 ang amihanan-sidlakang bahin sa Isabela, lakip ang Maconacon, Divilacan, Palanan, San Pablo, Cabagan, Delfin Albano, Santo Tomas, Santa Maria, Tumauini, Ilagan City, San Mariano ug Dinapigue.
Lakip usab sa mga lugar nga sakop sa Signal No. 1 ang amihanan ug sentrong bahin sa Apayao, partikular ang Calanasan, Luna, Santa Marcela, Flora, Pudtol ug Kabugao, ingon man ang amihanan-sidlakang bahin sa Ilocos Norte nga naglangkob sa Pagudpud ug Adams.
Gipatuman usab ang Signal No. 1 sa amihanan-sidlakang bahin sa Catanduanes, lakip ang Pandan, Bagamanoc, Panganiban, Viga ug Gigmoto.
Padayon nga gibantayan sa PAGASA ang lihok ug kakusog sa super typhoon samtang giawhag ang publiko nga mag-andam ug magmatngon sa posibleng kusog nga ulan ug uban pang peligro nga dala sa bagyo.