Nakumpiska saPolice Regional Office 10 (PRO-10) ang mga kontrabando nga nagkantidad og ₱8,212,036 ug nadakpan ang 145 ka indibidwal sa ilang sunod-sunod nga operasyon sa tibuok Northern Mindanao gikan Oktubre 12 hangtod 18, 2026.
Sa kampanya batok sa ilegal nga droga, nakahimo ang kapulisan og 58 ka operasyon nga miresulta sa pagkadakop sa 63 ka indibidwal ug pagkasakmit sa 619.884 ka gramos nga gidudahang shabu nga nagkantidad og ₱4,215,646.80.
Sa kampanya batok sa smuggling sa sigarilyo, tulo ka indibidwal ang nadakpan sa 25 ka operasyon, diin nasakmit ang mga sigarilyo nga nagkantidad og ₱3,931,760.
Nadakpan usab ang 63 ka mga pinangita sa balaod, lakip ang 16 ka Most Wanted Persons ug 47 ka ubang wanted persons.
Samtang, unom ka indibidwal ang nadakpan sa kampanya batok sa mga armas nga walay hustong dokumento, diin 16 ka gagmayng armas ang nakumpiska, boluntaryong gitugyan o narekober sa 15 ka operasyon.
Upat ka indibidwal ang nadakpan usab sa tulo ka operasyon batok sa ilegal nga pagmina, diin nasakmit ang mga mineral ug bug-at nga kagamitan nga nagkantidad og ₱92,110.
Dugang pa, unom ka indibidwal ang nadakpan sa lima ka operasyon batok sa ilegal nga sugal, diin nakumpiska ang ₱2,380 nga may kalabotan sa maong kalihokan.